المحطة اللي ورا حسني مبارك لو انت جاي من اتجاه حلوان هتبقى غمرة
لو انت جاي من المرج هتبقى عرابي
المحطة اللي ورا حسني مبارك ملهاش أي ذنب خالص في اللي بيحصل في البلد
كائنات حية اختزلت الثورة في شطب اسم مبارك من محطات المترو وكتابة بداله محطة الشهداء
وكائنات حية بردو بقت مهمة حياتها تدخل تشطب محطة الشهداء
وتكتب حسني مبارك
وهكذا ، لحد اما المحطة اللي ورا حسني مبارك اتبهدلت
هو اكمن غمرة يعني ملهاش ولاد ينزلولها اخبار في جرايد
ولا احمد عرابي شايل سيفه وبيقول عيب دا رتبة محترمة في الجيش الراجل
نبهدل فيهم كدا ؟؟
دا غير النقاش الحاد السافر السافل احيانا اللي بيدور بين راكبات عربة السيدات
اللي بطلوا يتكلموا في الطبيخ وبقوا بيتكلموا في السياسة
وبعدين ايه الفرق بين الطبيخ والسياسة يعني؟
ما الاتنين زفرين وبيزفلطوا في ايد الواحد
ارجوكم كفوا ايديكم واقلامكم الحبر والجاف والفلومستر عن المحطة اللي ورا حسني مبارك
ياا اما بجد انزل اقفلكوا في ميدان رمسيس واعمل ايفنت وادعي صحابي ونتظاهر ونطالب برحيل شفيق وعصام في نفس الوقت
ونعتصم لحد ما الناس للي في التحرير واللي في مصطفى محمود يمشوا
ليست هناك تعليقات:
إرسال تعليق