نفسي بجد !

ايوا نفسي فعلا حد يشلني زي العيال الصغيرة 
ويحدفني لفوق 
واخاف
ويلقفني
واضحك بصوت عالي 


ساعتها هاضحك من قلبي اني موقعتش بجد 
وانه مسبنيش بجد
وانه عرف يلقفني كويس
واطمن اني مهما طلعت لفوق ، والدنيا شدتني لتحت
هلاقي الايد اللي تلحقني 
هلاقي حد ميسبنيش لحد ما اتكسر عشان ياخد باله انه لازم يبقى موجود !


ايوا نفسي حد يحكيلي حدوتة زي العيال الصغيرة 
وفي الاخر الشاطر حسن يتجوز الأميرة 


ساعتها هاتطمن من قلبي ان الدنيا لسه مبتفرقش حد !




ايوا نفسي امي تاخدني في حضنها زي العيال الصغيرة 
وتضمني 
وابقى اصغر منها
ساعتها بس هاحس باماان من قلبي 


ان لسه في حضن كبير بيسعني 
وان الدنيا مش هتضيق بحد !


ايوا نفسي كل حاجة في الدنيا تبقى حلوة 
والحرب تبقى بمسدسات المية 
والضرب يبقى بعصيان بلاستك 
والعسكر يجري ورا الحرامية 


نفسي اقدر ارسم العالم تاني في ورقة 
الون الأرض بالأخضر 
والسما بالأزرق
والناس بالبني 


مكنش في رمادي في ألواني 
ولا كان في رسم بالهوا 


ايوا نفسي اصدق ان ابن الجيران بيندهلي عشان العب معاه بالكورة
وصحابي بيحبوني عشان انا بحبهم ومش بزعل حد
وعشان انا مؤدبة وطيبة


وان عمو " اي عمو " زي بابا


نفسي اصدق ان حد زي حد 
يمكن وقتها افرح بجد !